صحة وعافية
عن عمر محمود خالد أكتب…
وعن طلته الوريفة ومحياه البشوش
أحكي..!!
دكتور عمر ياخ …
ملامح سودانية صميمة …ووش بسام ….
يجيك كدا يوم الجمعه ذاتو يطمنك ….
والدكاترة ( مرصرصين ) …
الناس في السودان ما بتحب الكلام في المرض
لكن دكتور عمر بجيك بي فوق …
يفرشها ليك بي بيت شعر …يخليك ( مبنج )
حتى الدكاتره يشوفو شغلهم….
توعيه وتقوية ومناعة
وذوق وأدب وفن ….!! لا حقنة لا سماعة
بإطلالة أنيقة وحضور متدفق ولغة واثقة ….
يخرج صاحب صحة وعافية بين الشاشات يشهيك العافية
( عمر محمود خالد ) ليس مجرد طبيب بل هو شاعر وأديب …..وللناس حبيب …..!!
فاهم ولبيب …وللكل حاضر ومجيب …
تجمعني به محبة خاصة وونسة حلوة وود وجمال
دكتور عمر الراجل البشوش ….
يوزع الضحكات كما الزهور ….ويبهج الروح والحضور
أخذت اليه والدي عليه رحمة الله ذات مساء وقد كان يشكو آثار نزلة حادة …
فطبطب عليه بروحة قبل السماعة ….وكشف عليه
بكل حب ووداعة …
فنزلت ( النزلة ) في مكتبه وعدنا بدونها نحمل شحنة من الحب والأمل والأماني….والقفشات
وهكذا عمر …!!
ومع الجميع ….!!
لوالدي الرحمة وسعادة الآخرة فقد كان به سعيد ولعمر العافيه
