د.عبد اللطيف البوني يكتب: (جنا النديهة)

الخرطوم  تسامح نيوز

في كثير من قرى و ارياف السودان عندما يتأخر الزوجان في الإنجاب و تفشل جميع (المحاولات الداخلية) وتكثر الضغوط الاجتماعية والاقتصادية، عندها يتدخل الشيطان فيسول للزوجين الاستعانة *(بالقوى الخارجية والاقليمية)* فيذهبا للقبة (الضريح) أو البَنِيَّة و يندهان (يدعوان و يناديان) الولي الفلاني طلبا للخِلفة و ينذروا ويتعهدوا للشيخ أو الفكي بدفع بياض وقية ذهب اذا تم الإنجاب..

ولأن الله يبتلي الناس بالخير والشر؛ يصدف كثيراً بأن يولد لهم الطفل بعدها ويسمى بـ *”جنا النديهة”*.. ياتي هذا الطفل عادة واهن الجسد كثير الأمراض و العلل *(حكومة الثورة)* .. و يفرح أهله بولادته فرح هيستيري *(فرح السودان)*

و بعد الولادة تقام الولائم ويحلق رأس المولود و لكن *يترك قنبور* في اعلي رأسه *(الوثيقة الدستورية) يظل ينمو كعلامة إلى حين سداد الوقيةالتي يتعب في جمعها الأهل والأقارب (القومة للسودان)* ..

احد الشروط التي يضعها الفكي *(المجتمع الدولي)* انه في حالة ايي مرض أو حتى مجرد توهم بالمرض يجب أن يذهب بـ *جنا النديهة* إلى الفكي فقط *(مؤتمر باريس)* لا لطبيب أو حكيم أو ايي جهة أخرى.. ولكثرة تردده و اعتماده على الفكي يظهر *جنا النديهة* دائما بمظهر الضعيف المعتل الصحة..

وفي الغالب الاعم *جنا النديهة* بيكون تليفة و عوقة و دلاهة،، وبيدخل المدرسة عمر 10 سنين والسبب – غير اعتماده في علاجه على الفكي – وهو صغير وغير وجود القنبور في راسه،، بيرجع برضو لأسباب بيولوجية *(الولادة في سن متأخرة)* وأما السبب الاساسي فعنده علاقة مباشرة وقوية بطريقة التربية و التنشئة وتعامل الأبوين والأهل معاه بعد ولادته بالدلال المدمر *(حكومتنا جبناها بدم الشهداء لازم ندعمها ونصبر عليها)*

و نظرا لأنه *جنا النديهة* جاء بعد سنوات طويلة من التعب والإحباط و الإنتظار *(سنوات نظام الإنقاذ)* و لأنه رسخ في تفكير أهله استحالة ان يأتي طفل غيره *(يقعد بس)* .. الحاجة دي بتخلي أهله دايما محاوطنه بعناية مبالغ فيها ناتجة من حرصهم و خوفهم ان تصيبه علة أو مكروه *(انقلاب عسكري أو انتخابات مبكرة)* .. تلقاهم خايفين عليه، و ما بيرضوا فيه، و بيدلعوه دلع شديد *(شكراً حمدوك)* وإذا ايي زول إنتقد سلوكه فطوالي هو عندهم نيته سوداء و حاسدهم فيه، و ما عايز ليه وليهم الخير *(كوز مندس)*

ولأنهم بانين كل امالهم عليه فبيتعاموا عن كل غلطاته وتصرفاته عشان ما عايزين الصورة الوردية الخاتنها ليه في رأسهم تهتز *(حنبنيهو)* ..

الحاجة دي دايما بتجيب نتائج عكسية و بتخلي *جنا النديهة* أشتر وشليق، و بتخلي أهله دايما في حالة مشاكل مع ايي واحد يهبش ولدهم، مع انه ولدهم غالبا هو سبب كل المشاكل.. امه دايما في حالة دفاع عنه: ولدي مؤدب و عاقل ما بيعمل كدة *(حرية سلام وعدالة)* أما إذا ثبتت التهمة بالثابتة و بيصعب النكران فطوالي بتنتقل من الإنكار للتبرير: الاولاد كلهم بيعملوا كدة *(الكيزان برضو عملوا كدة) فلاحتكم فيه هو بس يعني؟ *(٣٠ سنة كنتوا وين) ؟

واحدة من أهم الحاجات البتميز اهل *جنا النديهة* انهم ولدهم العاقة دة بيشوفوه أذكى طفل في العالم رغم غباوته التي لا تتناطح فيها عنزان.. غير كدة بيتميزوا برضو بانهم بيفرحوا ويتبسطوا اذا ولدهم عمل حاجات تافهة و عادية بيعملوها حتى الاطفال الأصغر منه..

يعني عادي تلقى ابوه شايله فرحان و يبوس فيه عشان لبس السفنجة بالعدلة

أو زرّر القميص صاح أو حتى عشان قفل الماسورة، الاب بيكون مبسوط و يتفاخر بالحاجات دي *(إنجازات الثورة)* ويحكي فيها لناس الطاحونة نفر نفر..

والأدهى والأمر انه حتى التصرفات السلبية البيعملها *جنا النديهة* أهله بيقلبوها لشي إيجابي و يفرحوا بيها.. يعني عادي تلقى حبوبته متكيفة عشان شتمها *(ود بتي بقى فصيح)* و تلقى امه مبسوطة وبتحكي بكل فخر انه فلقها في رأسها بحجر و كسر الزير وكشح حلة الملاح *(رفع الدعم، زيادة التضخم، تعويم العملة)*..

كسرة: يحلنا الحلا بلة من *جنا النديهة* و العوقات أهل *جنا النديهة*= الاحزاب المجهرية..