كل الشعب السوداني الأبي ينتقد الوضع الراهن وكمان بقوا في ناس متخصصين في السياسة والاقتصاد وكلوا الا المجتمع داا ماف زول عايز يشتغل بيه ولايلتفتوا للتدني في حاجات كتيرة لانريد ان نزيد بنشرها بس نناشد كل من بيده زمام امر في موقع مسئولية يتقي الله في عمله ويعمل بالحديث الشريف ( كلكم راع وكلكم مسئول عن رعيته )
*السياسون في بلدي كالازواج المنفصلين وبينهم ابناء متنازعون بينهم كل زوج يتمني فشل الابناء حتي يتشفي ويضع اللوم علي الاخرحالة متآخرة شددديد .
*ما اجملها من اية اخرجوها من تحت الانقاض بكامل زيها الشرعي واخريات يمشين علي الارض بكامل تبرجهن.
*استغرب في كثير من الشعوب المسلمة يرتدي رجالها الطرح ونسائها تنسدل شعورهن علي كتوفهن
*رسالة لبعض مشرفات تراحيل الاطفال اجلسي في المقاعد الخلفية وسط الاطفال بستغرب لما اشوف مشرفة قاعدة في المقعد الامامي ومشغولة بالجوال
*الزمن الجميل وحاجاتوا الحلوة تتذكروا كروت الافراح ودرجاتها وتطورها وكيف كنا نحتفظ بها للذكري وثقافة انوو لو مكتوب العاقبة لكم في المسرات معناها تجهز حق الكشف ولو كتبوا وشكرا ديل ناس رافعين قزازهم .
ومنها المناسبات جنب البيوت والاطفال يفرحوا يوم تركيب الصيوان وكل واحد منتظر بيتهم يدخل جواا الصيوان وتتجهز الكوشة للعرسان بالمجهود الفني وكلا يدلو بدلوه البجيب جريد نخيل واخر فرشة ملونة وبهيجة ويشوفوا اى بيت في الحلة عندوكراسي جلوس يسلفوها منهم للعرسان ويوم المناسبة من شاي الصباح تجتمع النساء يقدموا في الخدمات والرجال يتلقوا في الخدمات الممتازة ويعزموا في الغاشي والماشي ويحلفوا طلاق كمان .
*كثير من المفاهيم الخاطئة المتداولة وصارت راسخة والبغيرها بيسموه متفلسف مثلا كلمة ذوي الاعاقة هم اصحاب الحالات الخاصة وذوي الهممولهم حقوق علي المجتمع وعلي الدولة وبالقانون واهم شريحة في المجتمع بس نحن المعاقون !!
* مسئول يستغرب من ازدياد حالات الطلاق ( يا راجل )
* قبل الخروج من النص : هناك فرق بين أن تكبر بالعمر، وآن تكبر بالعقل – الاولي اجبار والثانية اختيار .
*خارج النص : قال لزوجته : ممكن تعدي اليوم دا من غير نكد
قالت له بخاف يتراكم عليك احسن ليك اول بأول
