(هنا أمدرمان ) إسم أشهر مطعم شعبي بحي الملازمين امدرمان شرق ميدان الأهلية ،ويقدم المطعم أصنافا محددة من الأطعمة الشعبية بتقاليد سودانية جميلة ،يقول صاحب المطعم (نادر سيحة ) أن الفكرة جاءت لتكون إمتدادا للمطاعم السودانية بشكلها القديم ،وتم إختيار إسم (هنا امدرمان) لأن المطعم أصلا كان موقعه الأول قبالة إذاعة هنا امدرمان ،ونسبة لضيق المكان إنتقل المطعم لمكانه الحالي شرق مغسلة جدو للسيارات ،وكان أغلب رواده من العاملين بالأذاعة والتلفزيون ،ويضيف :
نحن أصلا ثقافتنا إستمديناها من الأذاعة ،حال كل السودانيين في الماضي ،وفي المطعم لا تسمع إلا الأغنيات التي تم تسجيلها بالأذاعة ،يعني أصغر زول ممكن تسمع صوتو هنا ممكن يكون خوجلي عثمان ،ومن الطرائف جاء٧ عدد من الزبائن وإنبسطوا جدا عندما وجدوا أغنيات عثمان حسين شغالة ،وطلبوا فول سادة بالشمار وزيت السمسم ،ونحن مشهورين بهذا النوع من الفول ،ولأنو فول جميل بنعمل ليهو خاطر ،مابنكسرو ،المهم الجماعة قالو عايزين شوية بصل توم ،وأديناهم ،وتاني قالو عايزين شوية طماطم ،أديناهم ،قام واحد منهم قال للمعلم :صلح الفول .
المعلم رد عليهو: بعد إلا نجيب ليكم محمدية بالكمنجة .
وقال نادر سيحة : نقدم الوجبات الشعبية بأسعار معقولة جدا تقديرا للظروف العامة للبلد ،ويشتهر المطعم بالفول والفسيخ والكوارع وشية السلات ،وقريبا سندخل العصيدة والكسرة بالسلطة ،الي جانب العصائر البلدية مثل الكركدي والتبلدي والليمون ،ودي حتكون في قسم إسمو (ربيع الدنيا ) ،والمأكولات البلدية تم تخصيص مكان لها وسميناهو (صالة العرض) تيمنا بالبرنامج الاذاعي الشهير للأستاذ علم الدين حامد ،والفكرة العامة هي تقدير عطاء إذاعة امدرمان ولكل الاعلاميين
