عبدالرحمن دقش يكتب: حكاية ساخرة من المهجر بالامارت !!
الخرطوم تسامح نيوز
حكايه ساخره فيها ما يضحك وما يبكي وكانت في ارض المهجر بدوله الامارات وحدثت وتدور حول عائله سودانيه عاشت زمنا طويلا في دنيا الاغتراب والغربه بالامارات وكانت ابرز الشخصيات فيها سعاد ويطلقون عليها ( البلدوزر ) والتي غرقت حتي اذنيها في حضاره جديده من التكنولوجيا وحال البلد المتعدد الالوان. !! بطل حكايه الاغتراب كان بشير ويسمونه عمو بشير الذي جاء الي الامارات بعد معاشه في السودان وجاء ليلحق بزوجته عائشه العامله بوزاره الصحه وعمو بشير من اهل بربر ونسبه لنشاطه في حل المشاكل اطلقوا عليه في الامارات ( حلال المشبوك ) التي عرفت في تاريخ السودان واطلقت علي الشيخ فرح ود تكتوك في سلطنه سنار حيث قال الحكمه المشهوره ( سنار مربوبه عرب وزنوج ونوبه واحسن تكون مربوبه ولا تتفرق طوبه. !!) في ذات مره استعان كمال مدرس التاريخ زوج سعاد بعمو بشير وهو الذي سيبلغ الستين قريبا وتتركه وزاره التربيه والتعليم بالامارات ويذهب الي المعاش وهو الذي جاء الي الامارات ومعه زوجته سعاد البلدوزر وابنته ريم واتي بعدها خالد وولد في الامارات !! استعان المعلم كمال بعمو بشير وطلب تدخل حلال المشبوك لانه في شفا حفره وفي حال مزعج للغايه من ( نظريات ) زوجته سعاد التي ما فتئت وتناضل وتخطط الوصول الي نخبه جارتها الاماراتيه مريم. وكان اول النظريات داخل منزله وارادت سعاد ان يتحول المنزل مثل منزل مريم وادخاله التكنولوجيا وكان الاخطر من سعاد الزوجه السودانيه ان اكلات السودان قد ابعدت من الدخول واصبح الاكل من المطاعم الهنديه والعربيه والمعظم من الساندويشات المتنوعه من الشاورما والبيزا وهلم جرا !! اما اسماء اهل البيت من الاسره فقد تبدل الحال وانقلبت علي اعقابها ووصلت الي ماهو افظع. لان سعاد اصبحت ( سوسو ) وكمال ( كمالو ) وريم ( ريمو ) وخالد ( خلودي ) ومن عجائب الدنيا ان سوسو تعتقد انها شابه في عمر الزهور. علي الرغم ان الفرق بينها وبين زوجها كمالو ثلاث سنوات !! اوضح كمال لعمو بشير ان نطق الاسماء من القرارات الجمهوريه والنطق بغيرها له عقاب الامم المتحده والجنائيه والذي زاد الطين بله ان سوسو ( بطلت ) لبس الثوب السوداني داخليا وخارجيا وكمان سوسو طلبت من جميع اهل البيت. معرفه الاسماء الجديده ومنها ( فوفو / حمودي / نصوري / فطومه / زينبو ) واضاف كمال بعد دا. ما فضل الا نقول ( كسرتو / شرموطو / قشاشو / علي نغمه. ( جلاسكو / ايس كريمو / شرباتو / ) !! يواصل كمال الحكايه الساخره ويقول ان سوسو تسمع منها كلمات ليست عربيه البته ومنها ( مب عارف ) و ( ايش تبقي ) و ( يا ريال ) وذات يوم قالت سوسو ( يا كمالو خلود بقي ريال ) ودا عندنا في السودان. ( خالد كبر وصار راجل ) !! وهنالك كلمات غريبه. مثل (الخرابيط ) وتعني اللخبطه واختلاط دا مع دا. !! وقال كمال لعمو بشير دا المسلسل الاول ودي كلها مناظر نظريات سوسو يا ( ريال ) وقال الاخيره وهو يضحك !! اتفق كمال مع عمو بشير لانهاء مشكله سوسو علي جناح السرعه لان كمال ( اتربس ) بنظريات سعاد ( سوسو ) وذكر كمال الخبر المفجع وهو ان زوجته سوسو طلبت غوايش احفظ مالك لعيد ميلادها القادم والتاريخ دا من عالم الخيال ورد عمو بشير بزعل شديد. ( عيد ميلاد شنو وسعاد اصبحت عجوز شمطاء ودخلت في الستين ) !! المهم لحل المشكله قد وصل ومعه ابنه معتز ووقتها كانت سوسو تتحدث ومشغوله بالموبايل مع صديقتها الاماراتيه ( مريوما ) وسمع عمو بشير الكلمات التي اذهلته وسمع العجيب مثل ( مب ) و( سالفه ) وكانت اخر الكلمات. ( يا مريوما .. الحين بدي لومي وعليك الله طرشي اللومي مع البشكاره … !! وهنا قاطعها عمو بشير وقال دا شنو اختي سعاد ؟!! وكان رد سوسو بحرقه واستفزاز ( اول حاجه انا زي بنتك وما اختك واسمي سوسو. وما سعاد وهنا طلب عمو بشير الترجمه من كمال ورد( يا مريم الان انا عاوزه ليمونه وارسليها لي مع الخدامه ) واضاف كمال تعرف ياعمو بشير عاوزه ليمونه لان سوسو قالت انها حامل وهل تصدق ذلك ؟! لكن عمو بشير كاد يقع ويطيح من حكايه انها حامل. وقال : اعوذ بالله وكيف حامل وهي في العمر دا كلو ؟! هنا تدخلت سوسو بعنف وحده وقالت ( يا جدو بشير انا ما كبيره وبعدين اهلنا كلهم كدا و( بلدو ) في العمر والطور دا. وانا بالفعل ( برقننت ) واذا ما عاجبك اقع البحر !!) اكيد عمو بشير ما عرف ان كلمه برقننت دي كلمه انجليزيه وتعني ( حامل ) !! في نفس اللحظه تدخل معتز ابن عمو بشير وقال لسعاد ( سوسو ) من وين عرفت الكلمه دي. يا خالتو سعاد ؟! ردت عليه بعنف وقالت ( يخلل ضروسك ودا قله ادب وانا اسمي سوسو وما خالتك !!) في نهايه المشكله انفجرت القنبله وخرج عمو بشير غاضبا لا يسمع ولا يري وصار يمشي ( سبعه تمانيه ) و( يتلحلح ) و( يبرطم ) بكلمات غير مفهومه وواضحه والتي اتت اليه من حيث لا يدري وكانت اخر كلماته ( ربنا يصبرك ياكمال ودي مصيبه دوليه وربنا يبعد عننا. ( بشور / عشوشه / معتزو / ) وكانت تلك من معادلات سوسو علي لسان حلال المشبوك وانها حكايه ساخره !!!
