فنانة تنشر مقالا لكاتب تنبأ بنجوميتها قبل ١٠ سنوات

نشرت الفنانة ميادة قمر الدين مقالا للكاتب الراحل د. عادل المكي تنبأ فيه بنجوميتها الفنية قبل ١٠ سنوات و كتبت ميادة:

(مع نهايات العام…. ونحن نستشرف أحلاماً جديدة… أسمحوا لى أن أترحم على الأستاذ الكاتب الصحفى الساخر (عادل الصادق المكى) الذى رحل عنا منذ سنوات مخلفاً والوجع.
وأبذل له الإهتمام على تنبؤاته الجميلة ورأيه الإيجابى… وأسأل الله أن أكون قد أفلحت فى أن أكون عند حسن ظنه.

المقال المرفق مكتوب فى العام 2012…وأنا أتلمس خطاى فى نجوم الغد.
له الرحمة والمغفرة… ولنا حسن الخاتمة)

*صاروخ إسمو(ميادة أمر الدين)*

‏د.عادل الصادق المكى – الباب البجيب الريح‏

أخذ على برنامج نجوم الغد….انو بيشجع على اجترار الأغاني المسموعة….ولو كان قد وضع من ضمن شروطه..ان تكون الاغنية جديدة لنج…من حيث الكلمات واللحن….. والاداء…..بنقدر نقيّم الغنية كمستمعين وكناس اضنينا جاهزة لسماع الموهبة..ونقيمّ صاحب الغنية ونقيم الاغنية باركانها التلاتة (الكلمة واللحن والاداء)..وكل الحاصل في برنامج نجوم الغد هو تقيّم للاداء وبس….. لانو بصراحة فترنا من سماع بعض الاغاني… باصوات مختلفة اسيادها يختو مرة و يصيبو مرة….احيانا ما يفضل للواحد مننا الا يدخل جوا جهاز التلفزيون ويمسك الزول البيغني ويخنقو..واللا يشيل المخدة ويحشرها ليهو في خشمو….ويشيل معاهو مصحف ويخليهو يحلف اليمين المغلظة على الهواء انو تاني ما يفتح خشمو ويغني….ميادة…. فتاة فادمة من نهر النيل وساكنة العباسية ورقمها 4.. غناية لمن بي غادي ..وبي غادي زاتا تفوتا….. لها بحة ما لاقتني في زول من الله خلقني…قدر ما الناس.. بحو.. و…بحو… بحة زي دي ما شفتها….غنت لام كلثوم بدون مزيكا… غمضت عيوني قلت يا ربي ام كلثوم دي قامت تاني….ولو سمعتها ام كلثوم تسكت ساكت وتخجل من حسها….حسيت بتحامل لجنة البرنامج عليها….ومحاولة احباطها ولازم يطلعو فيها حاجة غلط….والغلط الوحيد في غنا ميادة دي انها لما تغني بتخلي الشيب والشباب يتماليو طربا…. يا ناس نجوم الغد..ميادة ما نجمة ميادة شمش راسا عديل شمش وهجيرة ما بينفع معاها رش الحوش…ولا القعاد والرقاد تحت الاسبيليت….وميادة غلطانة تمر لاضنينا عبر نجوم الغد… كانت تقيف في ميدان الربيع في العباسية وتغني، لو ما الخرتوم دي جت قعدت ترقص ما تدوني ايدكم…. غنت ميادة بالرق..رق راسو عديل….وانا من الله خلقني ما شفت لي مرا غنت بالرق…علا زمااااان كان في حلبية شحادة بتشحد بالرق..وما تعرف!. ميادة غنت بالرق فاتقنت واجادت وابدعت.. وميادة الشافتا عيني دي..لو ادوها طنبور وقالو ليها غني بيهو ح تغني وتطربنا…السادة لجنة نجوم الغد ميادة دي لو ما جات الاولى لابيني لا بينكم…وتبقى الحكاية فيها ملعوبية… وبلبصة… ويا السر قدور رمضان الجايي ..دا شفتو؟…. خلي ناس افراح ورماز يضايرن ويزحن لها تقعد جنبهم..يا إمتن بحرش ليك وزير الاعلام يجيب برنامجك دا بعد السحور…اصلو هو متحلم عليك. واحرش لك ائمة المساجد ما يخلو ليك صفحة ترقد عليها، اصلهم ما لاقين شي ينضمو فيهو.. ولو ركبت راسك و ما جبتها، عكازي وعكازك وتطالعني الخلا!!!…..
قفل الباب:-
ببكي وبنوح وبصيح
للشـوفـتـن بتـريح
فرع النقا المميح
مـنو المـسـك بفيح
وكتين صباحو يبيح
بلـبل قلوبـنا يصـيح