الشاعرة توسل : محبوبي الخمري يشبه الريل…. قصيدتي المحببة
الخرطوم تسامح نيوز
كشفت الشاعرة توسل أحمد عبد الرحمن انها بدأت تكتب الشعر منذ الصغر عندما كان عمرها ١٠ سنوات مؤكدة أنها تكتب كل انواع الشعر الغنائي والحماس والعاطفية.
وأضافت انها تعاملت مع المطرب “مهاب عثمان” في عملين اخرهما تحت التنفيذ كما أنها تعاملت مع الملحن “صديق وزه” في عملين أيضا إضافة إلي الاستاذ عماد يوسف.
وقالت توسل أن أكثر قصيدة عجبتها بعنوان “السودان الغالي” و انها حتي الآن لم تشعر بالحزن في أي قصيدة كتبتها.
وأكدت توسل أن كتابة الشعر عندها ايحاء ولم يكن مرتبط بمواقف محددة.
ومن أبرز قصائد توسل
محبوبي الخمري
لونو يشبه الريل في جمال عيونو
الغزال النافر وصادي
ساهر بي جري دمعي دافق
المعاند وناسي ومفارق
قلت ليهو تعال ماتفارق
ياصبابتي وحبي وجنونو
الغزال النافر وصادي
شوف جمال جسمو النادي وانضر
والقوام الفارع مفصل
ياحبيب ماتقسي وتجهل
عمري دونك زايدات شجونو
الغزال النافر وصادي
يوم بسم والدر زان خشيمو
والجمال احتار في رشيمو
روحي هامت ودارت نجيمو
البرق يضوي لون سنونو
الغزال النافر وصادي
ومن أميز ما كتبته توسل
شوفو جمال سودانا الغالي فالو الخير واحب مكان
طلعت شمس الخير في شرقنا ضوت وبددت الاحزان
مرت في البحر المنساب عكست ضوها في الشطئان
وجملت اللوحه الذهبيه واحلي مكان بلدي السودان
قهوه وادروب وزبيديه نوبه وبني عامر اخوان
فن وحضاره بيوت خشبيه غنوه ورقصه وحب وكفاح
ياشرق السودان الضاحك مستبشر فيك الافراح
كسلا وعطبره نسمه هنيه نار وحديد لبلدنا سلاح
وقضارفنا السمسم دفق ومن الهضبه طلا صباح
شوفو جمال سودان الغالي فالو الخير واحب مكان
والنخلات شامخات في شمالنا وصوت طمبور بينسي الوجعه
ريله وقادله ولابسه التوب وراجلا يكرم ضيف الهجعه
ويحلف حلفا مامطبوق بعد الواجب ونسه وسجعه
وصوت ربابه في عز الليل صحي الشوق في الروح واللوعه
مروي ونبته شنوخ وحضاره عزه بعانخي وتاريخ زاهر
قصب السكر دنقلا حلفا مصدر عزنا بيها نفاخر
وديمه شمالنا عزيز في قلوبنا كاسنجر وخضارا الناضر
منقه شندي ورطب الساقيه نسمه حنينه واحساس غامر
شوفو جمال سودانا الغالي فالو الخير واحب مكان
في وسط السودان ننجم وبي بلد الحانيين مرينا
نص البلد القلبها دافي وقمحا اصفر لوح لينا
ونيلا ابيض لينا بيبسم منو شربنا وبيه عدينا
وود النيل الرامي شباكو وبت النيل السمحه حنينا
شفنا مروج خضرا وفتانه وبالخيرات والثروه تبشر
قطنا ابيض وفول سوداني انتاج وطني وبيهو بنفخر
وناس تتقالد بي حنيه وللخير دايما تحمد تشكر
هاشه وباشه نفوسا ابيه تنتج ولينا كمان بتصدر
شوفو جمال سودانا الغالي فالو الخير واحب مكان
ياخرطوم ياثروه حضاره نيل وشباب شادين الهمه
يامنبع ثوره اجدادنا الاشراف حافظين الذمه
ياجلابيه وطاقيه عراقي وشال لفه عمه
وياتوب يابهجه اريحيه فيكي جمال الكون اتلما
يامدرسه ياجامعه ي مسجد ياإعلام واعلام مرئيه
في العلم والتاريخ دي شهاده وياعداله سلام ياحريه
ياليل ياعود ياايقاع ياصوت فنان بي اريحيه
ي مصانع ومرابع خضرا ياسوق وثقافه وشعبيه
شوفو جمال سودانا الغالي فالو الخير واحب مكان
غربو جبال ورمال ومزارع مردوم نقاره وشبال
كرنق وكرير بي صوت نشوان وتراث موروث للاجيال
دخن وتبلدي وسمسم ولوبا ومطره دعاشا يسر البال
غابه هشاب وطلح وبنيه فايحه عطر ممزوج بدلال
كرم وشهامه وخلوه وحضره تكابه وقران وخلاوي
ورجال في النايبات حاضرين وفارس في الميدان بيلاوي
شان سودانا يصبح حر وماتغشاهو محن وبلاوي
وغرابيه نجيضه وشيخه زادا يشهي يشبع يداوي
وشوفو جمال سودانا الغالي فالو الخير واحب مكان
