الشعراء .. يفضلونها شينه..ما السبب
كتبت ذات مره ( مداعبا ) كل الشعراء الذين أعرفهم متزوجين من فتيات شينات .. وتساءلت عن الحكمه في هذا الأمر .. فثارت ثورة بعض زوجات اصدقائي الشعراء وقالت إحداهن .. تاني خلي هلاوي
يجي داخل البيت ده ..
المهم ان الموضوع أثار ضجه خاصة بعد أن روج له الشعراء أنفسهم .. مامن شاعر قرأ ما كتبت الا لقيني ضاحكا.. ربما لشئ في نفس يعقوب .. شعراء متزوجون مثني ورباع والحكمه كلهن شينات ..
ياربي ده يكون غضب من الله علي الشعراء القاعدين عمرهم كلو يتغزلو في بنات الناس .. عشان كده الله رماهم في شر أعمالهم .. واحد منهم قال كل الشعر الكتبو كتبو في زوجتو ..
ولما تشوف بي عينك تحلف دي الا يكتبو فيها نشيد .. بس علي الرغم من
كده .. انا حياتي ما شفتا زوجات طيبات ولطيفات وخفيقات ظل زي زواجات الشعراء ..
يا أخ ديل كفاهن صبرهم علي انهم متزوجين شعراء بكل حالات الفوضي والقلق في حياتهم مع طيارة العين .. اكتر من كده تاني شنو ..
صحي قاعدة الجمال نفسها
ما عندها قاعده ورب حسن عند زيد .. هو قبح عند عمرا .. من هنا يبقي كلامي فارغ ساي ..
ختاما لزوجات كل الشعراء اهدي اغنية عبدالرحمن الريح وابراهيم عوض ….
وانا عمري ما حبيت غير الجمال في الروح ..
المطلع بس .. ما تصلو حتة حبيبي يا اسمر ..
خدك عليه فصود ..
جرحني في قلبي ….
عبد الوهاب هلاوي
