معلومات هامة عن استهلاك عداد الكهرباء تعرف عليها
تسامح نيوز
نشر مختص في توزيع شبكة الكهرباء منشورا هاما للتعرف على استهلاك الكهرباء و عدادات الكهرباء تفيد المواطن في معرفة استهلاكه من شاشة العداد…
وقال : هناك 3 انوع من العدادات
كل نوع من الانواع ديل عندو كود بتكتبو في الشاشة بديك الاستهلاك للأجهزة الشغالة في اللحظة دي…
طيب تفصيل الطريقة كالآتي :
النوع_الاول العداد القديم البشتغل بسلك شاشة وشاشة ثابتة (عداد جنوب افريقيا)
(رقم العداد ببدأ بـ 04)
تكتب في الشاشة #1#
النوع_التاني شاشة متحركة بتشتغل بتوصيلها مع بلك الكهرباء (رقم العداد ببدأ بـ 37)
بتكتب في الشاشة 006
وتضغط الزر الادخال (الزر الأزرق)
النوع_الثالث جديد بشتغل بسلك شاشة برضو والبميزو انو شاشتو صغيرة زي الموبايل (رقم العداد ببدأ بـ 45)
بتكتب في الشاشه 050
وتضغط زر الادخال (الزر الاحمر)
الطريقة دي بتعرف بيها الاستهلاك للأجهزة الشغالة حاليا لو اشتغلت ساعة بتستهلك كم …
مثلاً لو عندك ثلاجة مكتوب في ديباجتها بتستهلك 120 واط
لو شغلتها براها وقفلت كل الأجهزة الفي البيت وعملت الكود بتاع استهلاك العداد بظهر ليك في الشاشة
0.12 لانو القيم في العداد مميزه بالكيلوواط.
لو شغلت مكيف ديباجتو 2200 واط
واستعلمت الاستهلاك من جديد بتديك في الشاشة 2.20
وهكذا ..
وده بوريك العداد شغال كويس وما عندك تسريب في الاستهلاك نتيجة توصيل ما كويس او توصيل لاجهزة انت ماعارفها .. وبتحصل الحاجات غالبا في العمارات الفيها شقق .. لانو طبلون العدادات والتوصيل مشترك مرات بكون في توصيلات مشتركة بالخطأ من كهربجي العمارة…
طيب لو عايز تأكد انو العداد ما بستهلك اكثر من اللازم اقفل مفتاح التأمين للبيت
واستعلم الاستهلاك الحالي … ح يظهر ليك الرقم 0.00
لو اداك رقم عند استعلام الاستهلاك اللحظي .. في الغالب في اجهزة تانيه موصله معاك في العداد خارج مفتاح التأمين للبيت بتاعك…
العدادات دي تحتوي على اكواد استعلام كتيرة وبتوريك حاجات كتيرة زي اجمالي الكهرباء الاشتريتها وبتحفظ قيمة وارقام التغذية لعدد خمسين شراء انت قمت بادخاله في العداد.
كمان في اكواد بتوريك متوسط الاستهلاك لي شهر وشهرين وثلاثة وبتوريك اعلى استهلاك كان ليك في شهر كم وبرضو اعلى استهلاك كان الساعة كم ويوم كم.
وبرضو في كود بوريك رصيدك الحالي حسب الاجهزة الشغالة ح يقضيك كم من الزمن عشان تعمل حسابك او تخفف الاجهزة لغاية ما تشتري كهرباء وتنزلها في العداد.
