الملحن مجاهد سيمت بعد ١٥ عاما من الصمت يكتب: معتز صباحي الجاني ام المجنى عليه؟

الخرطوم : تسامح نيوز

تحملت لفترة طويلة جدا امتدت لاكثر من خمسة عشر عام علي الميديا والصحافة المقروءة اتهام بانني السبب في تدمير معتز صباحي لانني سحبت الاغاني التي لحنتها وصنعت نجوميته وهي خمسة اغاني كالاتي:
1/ منك بديت رحله هواي
2/ صوره وصوت
3/ كمل جواي كلام الريد خلاص فوتي
4/ بيطلع منك ريدك تاني
5/ لو مرة حاولو يبعدوك
تغني معتز صباحي بهذه الاغاني لفترة اكثر من عامين دون استلم حقوقي المادية. ترددت علية بمنزله اكثر من مرة بشقة بمدينة النيل امدرمان وكنت اري سيارته خارج المنزل ووصل الحال الي ان اسمع صوت حديثه داخل المنزل ويخبرني من يفتح الباب بان معتز غير موجود بعدها ذهبت الي بشير السناري صاحب شركة السناري المشهورة التي كانت تنتج شرائط كاسيت معتز صباحي وجمعنا في منزله في الحارة الخامسة امدرمان وانتهي اللقاء بان يدفع معتز صباحي 50 الف جنية في العام 2007 ووافق ولكن طلب مهلة اسبوعين للسداد. انتهت المهلة وذهبت لبشير السناري وجمعنا بشير السناري مرة اخري وطلب معتز تخفيض قيمة المبلغ و بعد شد و جذب وافقت علي عشرين الف فقط بعقد تملك للاغاني لمدة عشرة سنوات ومرة اخري طلب مهلة للسداد اسبوع وايضا اخلف وعده لاكثر من تلاتة اشهر. ذهبت مرة اخرى لبشير السناري وقال لي بعد كده عداك العيب (معتز ده طرفي منو) وقال لي انت اعمل البتراه مناسب ومشكور وما قصرت . معتز اصبح لا يرد علي تلفوناتي وغير موجود بالمنزل كالعادة بعدها اصبح المهدر من كرامتي قد فاق الحدود المسموح بها لاكون محترما امام نفسي قبل الاخرين ومعتز وضعني في موقف المتسول لا المطالب بحقوقه، حينها قررت ان احسم اموري في اول مقابلة تجمعني به و الحتكون تحت عنوان (يا ابيض يا اسود). تقرر ان نتقابل بجوار المصنفات الأدبية في امدرمان انا ومعتز بعد فشل المحاولات السابقة وكان معي صديقي العازف ماجد علي صالح. طلبت من معتز ان يحسم الامر والان ومن غير تسويف واقسم بالله العظيم وكتابه الكريم قال بالنص (انا غناك ده ما دايرو، كده عندك حاجه عندي؟ ) قلت ليهو حاشا وكلا والسلام عليكم وذهب كل منا في حال سبيله وذهبت بعدها للمحامي بتاعي وتم اخطاره بالتوقف النهائي عن هذه الالحان علي كل الوسائط المسموعة والمرئية والحفلات العامة والخاصة .
انتهت تجربتي مع معتز صباحي بجملة (انا غناك دة ما دايرو) يعني انا حر في التصرف فيه من الان وصاعدا. بعد فترة جاء الي منزلي طه سليمان وقال لي بعد ما وقفت الاغاني من معتز ممكن (اشتريها)؟ قلت ليهو مافي مانع ولو عايز تشتريها وتغنيها. اتفقنا علي المبلغ وفترة التعاقد التي طالب بان تكون عشر سنوات وكان هذا في العام 2007 مرت الاعوام وانا اسال طه سليمان ليه ما بتغني الاغاني الاشتريتها بتاعت صباحي؟ وكان بيتهرب في الرد. مرت العشر سنوات ولم يغني طه سليمان الاغاني و لو لمرة واحدة. يلا كلنا كدة نسأل: ليه طه ماغني الاغاني دي وخلاها حبيسة عندو؟؟؟؟؟ طيب شنو كان قصدو من شراء الاغانى؟
هنا في محورين مهمات: الاول انو انا ماقلعت غناي من صباحي، بل الحقيقة ان معتز هو الرفض يغني الاغاني الخمسه من تلقاء نفسه وب كامل ارادته. المحور التاني انو انا ما اشتركت في مؤامرة بي دليل ان انا طه سليمان جاني كمشتري لاغاني اصبح لي كامل الحق في تسويقها زي ما الاستاذ التجاني حاج موسي اعاد تسويق كلمني يا حلو العيون من الاستاذ محمد ميرغني للاستاذ جمال فرفور وزي ما الاستاذ يوسف القديل سوق اغاني غناها الاستاذ وليد زاكي الدين لي الاستاذ محمود عبدالعزيز مع العلم الاستاذ جمال فرفور والاستاذ محمود عبدالعزيز غنوا الاغاني الاتحولت ملكيتها ليهم يبقي السؤال الابدي ليه بتشتري غناء وانت ماعندك الرغبة تغنيه طيله عشر سنوات فترة التعاقد؟
املك صوره من عقد شراء طه سليمان للاغاني يمكن الاطلاع عليه عند الضرورة.
الاسماء المذكورة في البوست بشير السناري وماجد علي صالح هم شهود علي هذه الحقائق وهم معروفين وموجودين وهم المرجع لمصداقيتي لمن يطلب التاكد مما سبق ذكره.
اما ما حدث قبل اشهر اتصل بي عثمان صباحي البروف مالك شركة البروف للانتاج الفني وهو اخ وصديق ومن اقرب الشخصيات لقلبي طالبا مبادرة جديدة فيما يخص موضوع معتز صباحي. عثمان البروف يعلم باسباب الخلاف مسبقا مني منذ سنوات. ولعلمه بان خلافي مع معتز صباحي مادي قام بمبادرة شراءالاغاني لصالح معتز صباحي فوافقت لاني لا احمل اي شئ في نفسي ضد معتز صباحي سوى مستحقاتي المادية فقط وجمهور معتز صباحي اكيد لاحظ انه اصبح يردد هذه الاغاني مره اخرى في حفلاته الجماهيرية والخاصة مما يؤكد مصداقيتي فيما اقول وهنالك اعمال جديدة ستجمعني مع معتز صباحي في الفترة القادمة ان شاءالله.
دي كل الحكاية والرواية (من طق طق لي السلام عليكم). لازم الناس تخت في الاعتبار ان دا عملي الاساسي الماعندي مصدر دخل غيرو. هل الطبيب بعالج مجان؟ وهل الصيدلي بدي علاج مجان؟ وهل بنركب المواصلات مجان؟ وهل بتاع الدكان بشيل مني اغاني بدل القروش؟ انا شخص عندى التزامات حياتية ما بتجيبها لي عفى الله عما سلف.